Toothbrush: మనం రోజూ వాడే టూత్బ్రష్ లక్షల కొద్దీ సూక్ష్మజీవులకు నివాసంగా ఉంటుందని పలు అధ్యయనాలు వెల్లడిస్తున్నాయి. టూత్బ్రష్పై 10 లక్షల నుంచి కోటికి పైగా బ్యాక్టీరియా, వివిధ రకాల సిలింద్రాలు, అలాగే లెక్కలేనన్ని వైరస్లు ఆశ్రయం పొందే అవకాశం ఉందని ఎండీపీఐ వెబ్సైట్లో ప్రచురితమైన ఒక కథనం పేర్కొంది. ఈ సూక్ష్మజీవులు బ్రష్ను వాడే వారి నోరు, వారి చర్మం, దాన్ని పెట్టే చోటు వంటి మార్గాల ద్వారా వస్తాయని జర్మనీలోని రైన్-వాల్ యూనివర్సిటీ ఆఫ్ అప్లైడ్ సైన్సెస్ మైక్రోబయాలజిస్ట్ మార్క్ కెవిన్ జిన్ వివరించారు. కొత్త బ్రష్పై కూడా పెద్ద సంఖ్యలో సూక్ష్మజీవులు ఉండొచ్చని బ్రెజిల్లో నిర్వహించిన అధ్యయనం తేల్చింది.
అయితే, ఈ సూక్ష్మజీవులలో చాలావరకు ప్రమాదకరం కావు. రోథియా డెనోకారియోసా, స్ట్రెప్టోకోకసీ మిటిస్, ఆక్టినోమైసెస్ కుటుంబానికి చెందిన బ్యాక్టీరియాలు దంతక్షయం కలిగించే సూక్ష్మజీవుల నుంచి రక్షించడంలో సహాయపడతాయి. అయినప్పటికీ స్ట్రెప్టోకోక్సీ, స్టాఫైలోకోకి వంటివి దంతక్షయానికి, చిగుళ్ల వాపుకు కారణమవుతాయని బ్రెజిల్లోని యూనివర్సిటీ ఆఫ్ సావోపాలో డెంటిస్ట్రీ ప్రొఫెసర్ వినిషియస్ పెడ్రాజీ పేర్కొన్నారు. ఎశ్చరీషియా కోలి, సూడోమోనాస్ ఎరుగినోసా, ఎంటరోబాక్టీరియాసియే వంటి హానికారక బ్యాక్టీరియా, సిలింద్రాలను కూడా టూత్బ్రష్లపై కనుగొన్నారు. ఇవి పొట్టలో ఇన్ఫెక్షన్లు, ఫుడ్ పాయిజనింగ్కు దారితీయవచ్చు.
ఇది కూడా చదవండి: Lifestyle: మీరు మొబైల్ చూస్తూ తింటున్నారా? ఏమవుతుందో తెలిస్తే ఇలా అస్సలు చేయరు!
బాత్రూంలో ఉండే వెచ్చని, తేమతో కూడిన వాతావరణం సూక్ష్మజీవుల వృద్ధికి అనుకూలం. టాయిలెట్ ఫ్లష్ చేసిన ప్రతిసారి మలం, నీళ్లు కలిసిన చిన్న నీటి బిందువులు (ఏరోసోల్స్) గాలిలో దాదాపు 1.5 మీటర్ల వరకు వ్యాప్తిస్తాయి. ఈ ఏరోసోల్స్ బ్యాక్టీరియా, ఫ్లూ, కోవిడ్-19, నోరోవైరస్ వంటి వైరస్లను కలిగి ఉండవచ్చని జిన్ హెచ్చరించారు. టూత్బ్రష్ టాయిలెట్కు దగ్గరగా ఉంటే, ఈ వైరస్లు బ్రిసిల్స్పై పేరుకుపోయే అవకాశం ఉంది. ఫ్లష్ చేసేటప్పుడు టాయిలెట్ సీటును మూసి ఉంచడం మంచిది. అయితే, ఈ నీటి బిందువులు అంత ఆందోళనకరం కాకపోవచ్చని నార్త్వెస్టర్న్ యూనివర్సిటీ ప్రొఫెసర్ ఎరికా హర్ట్మన్ అభిప్రాయపడ్డారు. గాలిలోకి విడుదలయ్యాక అనేక గట్-సంబంధిత సూక్ష్మజీవులు ఎక్కువ కాలం జీవించలేవని ఆమె వివరించారు. అయినప్పటికీ ఇన్ఫ్లుఎంజా, కరోనా వైరస్లు టూత్బ్రష్లపై కొన్ని గంటల పాటు, హెర్పెస్ సింప్లెక్స్ వైరస్-1 వంటివి 48 గంటల వరకు సజీవంగా ఉండగలవని కొన్ని అధ్యయనాలు తెలిపాయి. రోగనిరోధక వ్యవస్థ బలహీనంగా ఉన్నవారికి ఇది కొంచెం ఆందోళన కలిగించే అంశమని జిన్ చెప్పారు.
ఇది కూడా చదవండి: Aadhaar Loan: మీకు ఆధార్ కార్డు ఉందా..? ఎలాంటి పూచీకత్తు లేకుండా రూ.50 వేల రుణం!
టూత్బ్రష్ శుభ్రతకు కొన్ని చిట్కాలు పాటించవచ్చు. బ్రష్ను ఉపయోగించిన తర్వాత దానిని గాలికి ఆరేలా పెడితే సూక్ష్మజీవులు తగ్గుతాయి. దంతక్షయానికి కారణమయ్యే స్ట్రెప్టోకోకస్ మ్యూటన్స్ వంటి బ్యాక్టీరియా బ్రష్ బ్రిసిల్స్పై ఎనిమిది గంటల వరకు ఉండి, 12 గంటల తర్వాత చనిపోవడం మొదలవుతుంది. అమెరికన్ డెంటల్ అసోసియేషన్, US సెంటర్స్ ఫర్ డిసీజ్ కంట్రోల్ అండ్ ప్రివెన్షన్ వంటి సంస్థలు టూత్బ్రష్ హెడ్లను కవర్ చేయవద్దని లేదా మూసి ఉంచిన కంటైనర్లలో ఉంచవద్దని సూచిస్తున్నాయి. టూత్పేస్టులు సూక్ష్మజీవుల పెరుగుదలను తగ్గించడంలో సహాయపడతాయి. 1% వెనిగర్ ద్రావణంలో లేదా యాంటీసెప్టిక్ మౌత్వాష్ (0.12% క్లోర్హెక్సిడైన్ లేదా 0.05% సెటిల్పైరిడీనియం క్లోరైడ్)లో బ్రష్ హెడ్ను 10 నిమిషాల పాటు ఉంచడం ద్వారా బ్యాక్టీరియా సంఖ్య గణనీయంగా తగ్గుతుందని పెడ్రాజీ సూచిస్తున్నారు.
RBI Currency: రూ.100, రూ.500 నోట్లు మారబోతున్నాయా..? ఆర్బీఐ ప్లాన్ ఏంటి?
పాత, అరిగిపోయిన బ్రిసిల్స్ తేమ, పోషకాలను ఎక్కువసేపు నిల్వ ఉంచి బ్యాక్టీరియా వృద్ధికి తోడ్పడతాయి. అందుకే వైద్య సంస్థలు ప్రతి మూడు నెలలకొకసారి టూత్బ్రష్లను మార్చాలని సిఫార్సు చేస్తున్నాయి. భవిష్యత్తులో ప్రోబయోటిక్ పూతలు లేదా బయోయాక్టివ్ బ్రిసిల్స్ వంటివి టూత్బ్రష్లపై ఆరోగ్యకరమైన సూక్ష్మజీవుల సమతుల్యతను కాపాడటానికి ఉపయోగపడవచ్చని జిన్ పేర్కొన్నారు. అయితే దీనిపై ఇంకా చాలా పరిశోధన జరగాల్సి ఉంది.
మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి
