హిందువులు అత్యంత భక్తిశ్రద్ధలతో జరుపుకునే మహా శివరాత్రి కేవలం ఆధ్యాత్మిక పండుగ మాత్రమే కాదు.. జ్యోతిషపరంగా కూడా అత్యంత కీలకమైన రోజు. 2026 ఫిబ్రవరి 15న వచ్చే మహా శివరాత్రి, కొన్ని అరుదైన గ్రహస్థితుల కారణంగా ప్రత్యేక ప్రాధాన్యతను సంతరించుకుంది. ఈ రోజున చతుర్గ్రాహి యోగం, బుధాదిత్య యోగం, సర్వార్థ సిద్ధి యోగం అనే మూడు శక్తివంతమైన రాజయోగాలు ఏర్పడుతున్నాయి. ఈ అరుదైన గ్రహ సంయోగాలు కొన్ని రాశులకు అపారమైన అదృష్టం, ఆర్థిక లాభాలు, జీవితంలో సానుకూల మార్పులను తీసుకురావనున్నాయని జ్యోతిష్యులు చెబుతున్నారు. మరి ఆ అదృష్ట రాశులు ఏవో ఇప్పుడు తెలుసుకుందాం.
మేష రాశి: ఆర్థిక సమస్యలకు ముగింపు
మహా శివరాత్రి నాడు ఏర్పడే మూడు రాజయోగాల ప్రభావంతో మేష రాశి వారి అదృష్టం ప్రకాశించనుంది. శివుడి అనుగ్రహంతో ఇప్పటివరకు ఎదుర్కొన్న డబ్బు సమస్యలు క్రమంగా తొలగిపోతాయి. ఆగిపోయిన పనులు మళ్లీ ప్రారంభమవుతాయి.
ఈ సమయంలో విలాసవంతమైన వస్తువులు, వాహనం కొనుగోలు చేసే అవకాశాలు ఉన్నాయి. అవివాహితులకు తగిన భాగస్వామి లభించే సూచనలు కనిపిస్తున్నాయి. విద్యార్థులు చదువులో రాణించి, పరీక్షల్లో మంచి ఫలితాలు సాధించవచ్చు. శని ప్రభావం తగ్గడంతో మానసిక ఒత్తిడి కూడా తగ్గుతుంది.
కన్య రాశి: ఆర్థిక స్థిరత్వం, ఆకస్మిక లాభాలు
కన్యా రాశి వారికి ఈ మహా శివరాత్రి ఉజ్వల భవిష్యత్తుకు సంకేతంగా నిలవనుంది. మూడు రాజయోగాల ప్రభావంతో ఆర్థిక స్థిరత్వం ఏర్పడుతుంది. ఆదాయ మార్గాలు విస్తరించి, పాత అప్పుల నుంచి ఉపశమనం లభించే అవకాశం ఉంది. వివాహం కానివారికి మంచి సంబంధాలు కుదరొచ్చు. వివాహితుల కుటుంబ జీవితం మరింత సుఖంగా మారుతుంది. పిల్లల చదువు, కెరీర్లో గణనీయమైన పురోగతి కనిపిస్తుంది. ఆకస్మిక లాభాలు, శుభవార్తలు ఈ కాలంలో మిమ్మల్ని ఆనందపరుస్తాయి.
కుంభ రాశి: కెరీర్ గ్రోత్, ఆస్తి యోగం
కుంభ రాశి వారికి ఈ మహా శివరాత్రి ఎంతో ప్రత్యేకంగా ఉండబోతోంది. ఉద్యోగం, వ్యాపారం రంగాల్లో కొత్త అవకాశాలు లభిస్తాయి. ఉద్యోగార్థులకు శుభవార్తలు వచ్చే సూచనలు ఉన్నాయి. ఇల్లు లేదా భూమి కొనుగోలు చేయాలనుకుంటున్న వారికి ఇది అనుకూల సమయం. సామాజిక గుర్తింపు పెరుగుతుంది. మీ ప్రయత్నాలకు మంచి ఫలితం దక్కుతుంది. దీర్ఘకాలిక పెట్టుబడులకు ఈ సమయం చాలా అనుకూలంగా ఉంటుంది. ఆరోగ్యం స్థిరంగా ఉండి, ఉత్సాహంతో ముందుకు సాగగలుగుతారు.
శివానుగ్రహంతో జీవితం మారే అవకాశం
ఈ మహా శివరాత్రి నాడు శివుడిని భక్తిశ్రద్ధలతో పూజించడం వల్ల ఈ రాజయోగాల ఫలితాలు మరింత బలపడతాయని జ్యోతిష్య నిపుణులు సూచిస్తున్నారు. సరైన నిర్ణయాలు తీసుకుంటూ, ఈ శుభ కాలాన్ని సద్వినియోగం చేసుకుంటే జీవితం కొత్త మలుపు తిరిగే అవకాశం ఉంది.
(Disclaimer: ఈ వార్తలోని సమాచారం మత సంబంధమైన అంశాలపై ఆధారపడి ఉంది. పాఠకుల ఆసక్తి మేరకు అందించడం జరిగింది. దీనిని టీవీ9 తెలుగు ధృవీకరించదు.)
