వినడానికి కొంచెం వింతగా, అసలు లాజిక్ లేనిదిగా అనిపించినా.. నేటి సోషల్ మీడియా యుగంలో ఇవే అసలైన ప్రేమకు చిహ్నాలుగా మారిపోయాయి. ఫోటోలకు అందంగా కనిపించాలి, ఇన్ స్టాగ్రామ్ లో ట్రెండ్ అవ్వాలి.. ఇదే నేటి ప్రేమ సూత్రం. కేవలం రుచి మాత్రమే కాదు, డ్రామా కూడా ఉంటేనే అది అసలైన రొమాంటిక్ ఫుడ్ అని ఫిక్స్ అయిపోతున్నారు. మరి ఈ తరం యువతను ఉర్రూతలూగిస్తున్న ఆ వింత రొమాంటిక్ ఫుడ్స్ ఏంటో తెలుసుకుందాం..
పింక్ పాస్తా
ప్రస్తుతం జెన్ జీ రొమాన్స్కు అనధికారిక బ్రాండ్ అంబాసిడర్ ‘పింక్ పాస్తా’. ఇది తినడానికి ఎంత బాగుంటుందో ఎవరికీ తెలియదు కానీ, ఫేరీ లైట్ల కింద ఫోటోలకు మాత్రం అద్భుతంగా కనిపిస్తుంది. బీట్రూట్ తో చేసిన ఈ పింక్ లింగ్యుయిని పాస్తాను తమ ప్రేమ కథకు ఒక సాఫ్ట్ లాంచ్ లా వాడుకుంటారు. రొమాన్స్ అంటే గులాబీ పువ్వులు కాదు, పింక్ పాస్తా అని వీరు బలంగా నమ్ముతారు. ఎమోషనల్ ఎఫర్ట్ కంటే ఆస్తెటిక్ లుక్ కే వీరు ప్రాధాన్యత ఇస్తారు.
లోడెడ్ ఫ్రైస్
ప్రేమికుల రోజున జెన్ జీ కి ఇష్టమైన మరో ఫుడ్ ‘లోడెడ్ ఫ్రైస్’. పైన చీజ్, జలపెనోస్తో నిండి ఉండే ఈ ఫ్రైస్ అంటే వీరికి ప్రాణం. దీనిని రొమాంటిక్ అని ఎందుకు అంటారంటే.. ఇవి తింటుంటే ఎవరూ గొడవ పడరు, పైగా బంధాల్లో ఉండే బాధను ఇవి మరిపిస్తాయని వీరి ఫీలింగ్. ముఖ్యంగా సార్కాజంతో మాట్లాడుకునే జంటలకు, సిట్యుయేషన్ షిప్స్ లో ఉన్నవారికి ఇది ఒక గొప్ప కంఫర్ట్ ఫుడ్.
బబుల్ టీ
తరానికి బబుల్ టీ అంటే కేవలం ఒక డ్రింక్ కాదు, కప్పులో ఉన్న మన్మథుడు అని అర్థం. స్ట్రాబెర్రీ, రోజ్ లేదా లావెండర్.. ఇలా ఏ రంగులో ఉన్నా, అది ఫోటోలకు బాగుంటే చాలు రొమాంటిక్ అయిపోతుంది. మీరు సింగిల్ అయినా లేక రిలేషన్ షిప్ లో స్పష్టత లేకపోయినా.. బబుల్ టీ మాత్రం మీకు ఎప్పుడూ నమ్మకమైన తోడుగా ఉంటుంది. ఇది మిమ్మల్ని ఎప్పుడూ వదిలిపెట్టదు (Ghosting చేయదు) అని వీరి నమ్మకం.
హార్ట్ షేప్ సుషీ
నిజానికి సుషీ అనేది ఒక సాంప్రదాయ వంటకం. కానీ దీనిని కూడా హృదయాకారంలో మార్చేసి, దానిపై డ్రామా క్రియేట్ చేయడం జెన్ జీ కి మాత్రమే సాధ్యం. అది తింటుంటే విడిపోతున్నా సరే, పింట్రెస్ట్ బోర్డులా ఫోటోలకు ఫోజులిస్తే చాలు అనుకుంటారు. పచ్చి చేప ముక్కలను గుండె ఆకారంలో పేర్చి, దానిని రొమాన్స్ అని పిలవడం నిజంగా ఒక వింతే.
ఫ్లేమింగ్ డిజర్ట్స్..
డిజర్ట్ టేబుల్ మీదకు రాగానే మంటలు రేగాలి లేదా పొగలు రావాలి.. అప్పుడే అది రొమాంటిక్. సిజ్లింగ్ బ్రౌనీలు, తిరామిసు వంటి వంటకాలు మంటలతో వస్తుంటే జెన్ జీ ఉత్సాహం మామూలుగా ఉండదు. ఎందుకంటే వీరి జీవితంలో డ్రామా ఎంత ముఖ్యమో, తిండిలో కూడా అంతే డ్రామా ఉండాలని కోరుకుంటారు. ఆ మంటలను రికార్డ్ చేసి సోషల్ మీడియాలో పెట్టడమే అసలైన రొమాన్స్.
నూడుల్స్, ఓవర్లోడెడ్ మిల్క్ షేక్స్
ఎక్కువ ఖర్చు పెట్టలేము కానీ వైబ్ కావాలనుకునే జంటలకు నూడుల్స్ గిన్నె ఒక రొమాంటిక్ ఆప్షన్. వేడి వేడి సూప్ మీద ఒకరికొకరు నూడుల్స్ తినిపించుకోవడం వీరికి ఒక రకమైన అనుబంధం. అలాగే డోనట్స్, విప్పింగ్ క్రీమ్, క్యాండీలతో నిండిన మిల్క్ షేక్స్ కూడా వీరి లిస్టులో ఉంటాయి. ఇవి చూడటానికి బాగుంటాయి కానీ తాగేటప్పుడు మాత్రం కొంచెం కష్టమే. అయినప్పటికీ ఫోటోల కోసం వీటిని రొమాంటిక్ అని పిలుచుకుంటారు.
ప్రేమ అంటే నిర్వచనం మారినట్లే, దానిని సెలబ్రేట్ చేసుకునే విధానం కూడా మారిపోయింది. జెన్ జీ కి రొమాన్స్ అంటే కేవలం భావోద్వేగం మాత్రమే కాదు, అదొక సోషల్ మీడియా ఫీడ్. కళ్ళతో చూడటం కంటే కెమెరాతో చూస్తూ ఆస్వాదించడమే నేటి ప్రేమ భాష.
