భారత ఆర్థిక వ్యవస్థను మరింత బలోపేతం చేసే లక్ష్యంతో, కేంద్ర ఆర్థిక మంత్రి నిర్మలా సీతారామన్ ఫిబ్రవరి 1, 2026న పార్లమెంటులో కేంద్ర బడ్జెట్-2026ను ప్రవేశపెట్టనున్నారు. చరిత్రలో తొలిసారిగా, ఈ సారి ఆదివారం పార్లమెంటులో బడ్జెట్ సెషన్స్ జరగనున్నాయి. నిర్మల సమర్పించే ఈ బడ్జెట్ కోసం దేశవ్యాప్తంగా ప్రజలు, పరిశ్రమలు, పెట్టుబడిదారులు భారీ అంచనాలతో ఎదురుచూస్తున్నారు. ఎందుకంటే ఇది కేవలం వార్షిక ఆర్థిక ప్రణాళిక మాత్రమే కాదు.. ఇది రాబోయే సంవత్సరాలకు భారతదేశ ఆర్థిక దిశను నిర్దేశిస్తుంది.
మోదీ నేతృత్వంలో మూడో బడ్జెట్
ప్రధాని మోదీ నేతృత్వంలోని కేంద్ర ప్రభుత్వం ప్రవేశపెట్టిన మూడవ బడ్జెట్ ఇది. ఈసారి బడ్జెట్పై భారీ అంచనాలు ఉన్నాయి. ‘అభివృద్ధి చెందిన భారతదేశం లక్ష్యంతో రూపొందుతున్న బడ్జెట్, ఆర్థిక వృద్ధితో పాటు సామాజిక సమానత్వం, ఉద్యోగ సృష్టి, దీర్ఘకాలిక స్థిరత్వంపై దృష్టి సారిస్తుందని ఆర్థికవేత్తలు భావిస్తున్నారు. ప్రపంచవ్యాప్తంగా కొనసాగుతున్న ఆర్థిక అనిశ్చితి, సరిహద్దుల వద్ద ఉద్రిక్తతలు, భౌగోళిక రాజకీయ పరిణామాల మధ్య, దేశీయ ఆర్థిక వ్యవస్థను రక్షించడంలో బడ్జెట్ కీలక పాత్ర పోషిస్తుంది. ఈ క్రమంలో పెట్రోల్, డీజిల్, గ్యాస్ ధరలపై పన్నులు పెరిగే అవకాశం ఉందని, ఇది సామాన్యులపై భారం పడుతుందని వార్తలు వస్తున్నాయి.
GST పరిధిలోకి పెట్రోల్, డీజిల్?
ఈ క్రమంలో బడ్జెట్లో చమురు, గ్యాస్ ధరలపై పన్ను చర్చనీయాంశంగా మారే అవకాశం ఉంది. ముడి చమురు, సహజ వాయువు, విమాన టర్బైన్ ఇంధనం (ATF)లను GST పరిధిలోకి తీసుకురావాలని పరిశ్రమ వర్గాలు చాలా కాలంగా డిమాండ్ చేస్తున్నాయి. ప్రస్తుతం, పెట్రోల్ డీజిల్ కేంద్ర ఎక్సైజ్ సుంకం, రాష్ట్ర VATకి లోబడి ఉన్నాయి. దీనితో మొత్తం పన్ను భారం 50-60 శాతానికి చేరుకుంటుంది. వీటిని 5% GST శ్లాబ్లో చేర్చినట్లయితే, పన్ను భారం తగ్గుతుంది. అలాగే ఇంధన ధరలు కూడా గణనీయంగా తగ్గుతాయి.
పన్నులు పెరిగే ఆవకాశం!
అయితే, ప్రభుత్వానికి ఆదాయ లోటు వచ్చే ప్రమాదం ఉన్నందున పన్నులు పెరుగుతాయా అనే సందేహం కూడా లేకపోలేదు. అయితే, ద్రవ్యోల్బణాన్ని నియంత్రించడమే ప్రభుత్వ ప్రధాన లక్ష్యం కాబట్టి ప్రభుత్వం పెట్రోల్, డీజిల్ ధరలను తగ్గించే విధానాన్ని ఎంచుకుంటుందని విశ్లేషకులు అభిప్రాయపడ్డారు. ఉదాహరణకు, LPG తక్కువ సేకరణకు పరిహారంగా రూ. 30,000 కోట్లు ఇవ్వవచ్చని అంచనా ఉండగా ఇది సాధారణ కుటుంబాలకు ప్రత్యక్ష ఉపశమనం కలిగించే అవకాశం ఉంది.
చమురు పన్నులను నేరుగా పెంచడం కంటే, వాటిలో మార్పులు చేసే అవకాశం ఎక్కువగా ఉందని విశ్లేషకులు అంటున్నారు. ప్రపంచంలో మూడవ అతిపెద్ద చమురు వినియోగదారుగా ఉన్న భారతదేశం, దేశీయ ఉత్పత్తిని 100 మిలియన్ మెట్రిక్ టన్నులకు (MMT) పెంచే లక్ష్యంతో ముందుకు సాగుతోందని. ఈ సందర్భంలో, బడ్జెట్ చమురు అన్వేషణ, ఉత్పత్తికి ప్రోత్సాహకాలను అందించే అవకాశం ఉంది. ఉదాహరణకు, కొత్త ప్రాజెక్టులకు పన్ను సెలవులు లేదా తక్కువ సుంకాలు ప్రకటించే అవకాశం ఉంది.
అయితే, రష్యా-ఉక్రెయిన్ యుద్ధం వంటి అంతర్జాతీయ పరిణామాల కారణంగా ప్రపంచ చమురు ధరలు పెరిగితే, పన్నులు లేకుండా కూడా ప్రజల జేబులపై ప్రభావం చూపే అవకాశం ఉంది. అదే సమయంలో, ప్రభుత్వ క్లీన్ ఎనర్జీ విధానంలో భాగంగా గ్రీన్ హైడ్రోజన్, సౌర విద్యుత్, పవన విద్యుత్ రంగాలకు సబ్సిడీలు పెరిగే అవకాశం ఉంది.
మరిన్ని బిజినెస్ వార్తల కోసం ఇక్కడ క్లిక్ చేయండి.
