చాలా మంది హోటల్ స్టైల్ చన్నా మసాలా ఇంట్లో రావడం లేదని అనుకుంటారు. కానీ, శనగలను ఉడికించేటప్పుడు వాడే బిర్యానీ ఆకు, నల్ల ఏలకుల నుండి.. చివర్లో వాడే కసూరి మేథీ వరకు ప్రతిదీ దీని రుచిని పెంచుతాయి. ముఖ్యంగా ఉడికించిన శనగలను, పెరుగును కలిపి గ్రైండ్ చేయడం వల్ల గ్రేవీకి సాఫ్ట్ టెక్స్చర్ వస్తుంది. పంజాబీ స్టైల్లో ఉండే ఈ స్పెషల్ చన్నా మసాలా తయారీ విధానం మరియు అందులోని ముఖ్యమైన మసాలా దినుసుల గురించి ఇప్పుడు వివరంగా తెలుసుకుందాం.
కావలసిన పదార్థాలు :
ఉడికించడానికి: తెల్ల శనగలు (1 కప్పు – 8 గంటలు నానబెట్టినవి), బంగాళాదుంప (1), బిర్యానీ ఆకు, నల్ల ఏలకులు (3).
గ్రైండింగ్ కోసం: పచ్చిమిర్చి (2), వెల్లుల్లి (5), అల్లం (2 అంగుళాలు), చిక్కటి పెరుగు (3 టేబుల్ స్పూన్లు), సగం ఉడికించిన బంగాళాదుంప, కొన్ని ఉడికించిన శనగలు.
తయారీకి: ఉల్లిపాయ తరుగు, పసుపు, కారం, ధనియాల పొడి, చన్నా మసాలా, ఉప్పు, నూనె.
స్పెషల్ తాలింపు: నెయ్యి, ఎండుమిర్చి, అల్లం ముక్కలు, కసూరి మేథీ, ఇంగువ, కాశ్మీరీ కారం పొడి.
తయారీ విధానం :
కుక్కర్లో నానబెట్టిన శనగలు, బిర్యానీ ఆకు, నల్ల ఏలకులు, బంగాళాదుంప వేసి 6 విజిల్స్ వచ్చే వరకు మెత్తగా ఉడికించుకోవాలి.
ఉడికించిన శనగల్లో నుంచి కొన్నింటిని, సగం బంగాళాదుంపను తీసుకుని అల్లం, వెల్లుల్లి, పచ్చిమిర్చి మరియు పెరుగుతో కలిపి మెత్తగా గ్రైండ్ చేసుకోవాలి.
పాన్లో నూనె వేసి జీలకర్ర, ఉల్లిపాయ ముక్కలు వేసి వేయించాలి. తర్వాత పసుపు, కారం, ధనియాల పొడి, చన్నా మసాలా వేసి పచ్చి వాసన పోయేలా వేయించాలి.
గ్రైండ్ చేసిన మసాలా పేస్ట్ వేసి నూనె పైకి తేలే వరకు వేయించిన తర్వాత.. ఉడికించిన శనగలను (నీళ్లతో సహా) మరియు మిగిలిన బంగాళాదుంప ముక్కలను వేసి 10 నిమిషాలు ఉడికించాలి.
చిన్న పాన్లో నెయ్యి వేడి చేసి ఎండుమిర్చి, అల్లం తరుగు, కసూరి మేథీ, ఇంగువ, కాశ్మీరీ కారం వేసి వేయించి, ఆ తాలింపును చన్నా మసాలాలో కలపాలి. చివర్లో కొత్తిమీర చల్లుకుంటే వేడివేడి పంజాబీ చన్నా మసాలా రెడీ!
