బర్రెలలో పాల ఉత్పత్తిని పెంచడానికి, వాటి ఆరోగ్యాన్ని కాపాడటానికి కొన్ని ముఖ్యమైన పద్ధతులను పాటించడం అవసరమని నిపుణులు చెబుతున్నారు. డైరీ ఫామ్ల విజయానికి ఇదే కీలక విషయమని పేర్కొంటున్నారు. డైరీ ఫామ్ నిర్వహణలో, కేవలం వ్యాపార కోణం కాకుండా, జంతువుల సంరక్షణకు పెద్దపీట వేయాలి.. అప్పుడే.. ఈ రంగంలో మరింత వృద్ధిని పొందగలమని డైరీ ఫామ్ నిపుణులు చెబుతున్నారు. బర్రెలలో అధిక పాల ఉత్పత్తికి సంబంధించి, అనేక ముఖ్యమైన అంశాలను పరిగణనలోకి తీసుకోవాలి. ముందుగా, ప్రతి జంతువు సామర్థ్యాన్ని అర్థం చేసుకోవడం అత్యవసరం. జాతి ఎంపిక అనేది పాల ఉత్పత్తిని ప్రభావితం చేసే ప్రాథమిక దశ. మంచి జాతికి చెందిన బర్రెలను ఎంచుకోవడం ద్వారా అధిక దిగుబడికి పునాది వేయవచ్చు.
ఆ తర్వాత, జంతువు వచ్చిన వాతావరణం, అది అలవాటు పడిన ఆహారం గురించి తెలుసుకోవాలి. ఒక కొత్త జంతువును ఫామ్లోకి తీసుకువచ్చినప్పుడు, దానికి అలవాటైన వాతావరణాన్ని, ఆహారాన్ని క్రమంగా మార్చాలి. తక్షణమే పాల ఉత్పత్తిని ఆశించకుండా, దానికి అనుకూలమైన వాతావరణాన్ని, సరైన పోషకాహారాన్ని అందించి, మెల్లమెల్లగా దాని పాల ఉత్పత్తి సామర్థ్యాన్ని పెంచాలి.
జంతువుల ఆరోగ్యం, వ్యాధుల నివారణ కూడా అధిక పాల ఉత్పత్తికి అంతే ముఖ్యం. బర్రెలలో తరచుగా వచ్చే సీజనల్ వ్యాధులలో “గాలి రోగం” ఒకటి. ఈ వ్యాధి సోకినప్పుడు జంతువుల నోటిలో, కాళ్ళలో పుండ్లు ఏర్పడి తీవ్ర ఇబ్బందులకు గురవుతాయి. ఇది డైరీ ఫామ్లకు చాలా ప్రమాదకరమైన వ్యాధి. ఈ వ్యాధి రాకుండా నివారించడానికి సకాలంలో టీకాలు వేయించడం తప్పనిసరి. అంతేకాకుండా నిపుణులైన పశువైద్యుల సలహాలను తీసుకోవాలి..
ఆహారం.. సూచనలు..
వారు అందించే సూచనలను, టీకాలను పాటిస్తూ జంతువులను ఆరోగ్యంగా ఉంచుకోవాలి.. పశువైద్యుల నిరంతర మద్దతు, సలహాలు బర్రెల ఆరోగ్యానికి, తద్వారా అధిక పాల ఉత్పత్తికి దోహదపడతాయి. సరైన జాతి ఎంపిక, పోషక విలువలు గల ఆహారం.. అంటే తవుడు, కొబ్బరి పిట్టు లాంటివి ఇంకా అనుకూల వాతావరణం, వ్యాధుల నివారణకు టీకాలు, నిపుణులైన పశువైద్యుల సహాయం – ఈ అంశాలన్నీ డైరీ ఫామ్ నిర్వహణలో సమగ్రంగా పాటించినప్పుడే అధిక పాల దిగుబడి, విజయవంతమైన వ్యాపారం సాధ్యమవుతుందని నిపుణులు చెబుతున్నారు.
మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..
