పిల్లలు కూరగాయలను అయిష్టంగా చూడటం వెనుక కేవలం మొండితనం మాత్రమే కాదు, శాస్త్రీయ కారణాలు కూడా ఉన్నాయని నిపుణులు చెబుతున్నారు. వారిని బలవంతం చేయకుండా, కూరగాయలను ఇష్టపడేలా చేసే ఐదు అద్భుతమైన చిట్కాలేంటో చూద్దాం..
పిల్లల ఎదుగుదలకు కూరగాయలు చాలా ముఖ్యం. కానీ వారు మాత్రం తీపిగా ఉండే పదార్థాలను లేదా జంక్ ఫుడ్ ను కోరుకుంటారు. ఆకుకూరలు, కూరగాయలు చేదుగా ఉన్నాయని వారు భావిస్తారు. నిజానికి పిల్లల నాలుకపై ఉండే రుచి గ్రంథులు పెద్దల కంటే చాలా సున్నితంగా ఉంటాయి. అందుకే మనం మామూలుగా భావించే చేదు కూడా వారికి విపరీతంగా అనిపిస్తుంది. కూరగాయల రంగు, ఆకృతి కూడా వారిని భయపెట్టవచ్చు. కింది చిట్కాలను పాటిస్తే పిల్లలు అన్ని కూరగాయల్ని ఇష్టంగా తింటారు.
- పిల్లల నాలుకపై రుచిని గుర్తించే కణాలు ఎక్కువగా ఉండటం వల్ల వారికి బ్రోకలీ లేదా పాలకూర వంటివి చాలా చేదుగా అనిపిస్తాయి. ఇది సహజ సిద్ధమైన రక్షణ వ్యవస్థ. దీనిని అధిగమించాలంటే ఆ కూరగాయను పదే పదే పరిచయం చేయాలి. ఒక కొత్త కూరగాయను పిల్లలు అలవాటు చేసుకోవడానికి కనీసం 10 నుండి 15 సార్లు ప్రయత్నించాల్సి ఉంటుంది. ఓపికగా ఉండటం ఇక్కడ చాలా ముఖ్యం.
- కొందరు పిల్లలకు కరకరలాడే క్యారెట్లు ఇష్టం ఉండవచ్చు, కానీ అవే ఉడికించి మెత్తగా చేస్తే నచ్చకపోవచ్చు. ఒక్కోసారి ఆ మెత్తదనం వారికి వాంతి వచ్చేలా చేస్తుంది. అందుకే కూరగాయలను ఉడికించడం, వేయించడం, తురమడం లేదా ప్యూరీలా చేయడం వంటి రకరకాల పద్ధతుల్లో వండి పెట్టి చూడాలి. వారికి ఏ రూపంలో నచ్చుతుందో గమనించి, ఆ విధంగా అందిస్తే వారు సులభంగా తింటారు.
- రెండు నుండి ఆరేళ్ల లోపు పిల్లల్లో కొత్త ఆహారాన్ని చూడగానే ఒక రకమైన భయం కలుగుతుంది. దీనిని ‘ఫుడ్ నియోఫోబియా’ అంటారు. దీనిని పోగొట్టడానికి పిల్లలను కూరగాయల మార్కెట్కు తీసుకెళ్లడం, వారితో కలిసి కూరగాయలు కడిగించడం వంటి పనుల్లో భాగస్వాములను చేయాలి. వారు ఆ కూరగాయలతో ఆడుకుంటూ, వాటిని చూస్తూ ఉంటే నెమ్మదిగా ఆ భయం పోయి ఉత్సుకత పెరుగుతుంది.
- పిల్లలు తమ తల్లిదండ్రులను చూసే అన్నీ నేర్చుకుంటారు. ఇంట్లో అందరూ కూరగాయలను ఇష్టంగా తింటుంటే, పిల్లలు కూడా అది సాధారణ ఆహారమే అని భావిస్తారు. తల్లిదండ్రులు స్వయంగా కూరగాయలు తింటూ వాటి రుచి గురించి సరదాగా మాట్లాడాలి. “క్యారెట్ చాలా తీపిగా ఉంది” అని మీరు అంటుంటే, వారు కూడా రుచి చూడటానికి ఆసక్తి చూపిస్తారు.
- ప్లేటు నిండా కూరగాయలు వడ్డిస్తే పిల్లలు భయపడి అసలు తినరు. చాలా తక్కువ మొత్తంలో, కేవలం ఒక ముక్కను మాత్రమే పరిచయం చేయాలి. “ఇది మొత్తం తినక్కర్లేదు, ఒక్కసారి టేస్ట్ చూడు చాలు” అని చెప్పడం వల్ల వారిపై ఒత్తిడి తగ్గుతుంది. బలవంతంగా తినిపించడం లేదా తింటే చాక్లెట్ ఇస్తానని లంచం ఇవ్వడం వంటివి దీర్ఘకాలంలో నెగటివ్ ఫలితాలను ఇస్తాయి.
కూరగాయలను ఒక శిక్షలా కాకుండా, ఆటలా లేదా అన్వేషణలా మార్చండి. వెజిటబుల్ స్టిక్స్, స్మైలీ ప్లేట్స్ వంటివి పిల్లలను ఆకర్షిస్తాయి. ఇంట్లో చిన్న కిచెన్ గార్డెన్ ఉంటే, తాము పెంచిన మొక్కల నుండి వచ్చిన కూరగాయలను తినడానికి వారు మరింత ఉత్సాహం చూపిస్తారు.
