అడవికి రాజు సింహం. ఆ గంభీరమైన గర్జన వింటేనే జంతువుల గుండెలు ఆగిపోతాయి. కానీ అడవి రాజుకే ఎదురు నిలిచి, కళ్లలో కళ్లు పెట్టి గర్జించిన ఒక ఆడ సింహం వీడియో ఇప్పుడు ఇంటర్నెట్ను షేక్ చేస్తున్నాయి. గుజరాత్లోని ప్రఖ్యాత గిర్ నేషనల్ పార్క్లో వెలుగుచూసిన ఈ అరుదైన దృశ్యాన్ని వన్యప్రాణి ఫోటోగ్రాఫర్ ఉర్మిల్ ఝవేరి తన కెమెరాలో బంధించారు. వైరల్ అవుతున్న ఈ వీడియోలో.. ఒక మగ సింహం తన గంభీరమైన స్వరం వినిపిస్తుండగా, దానికి ఏమాత్రం తగ్గకుండా ఒక ఆడసింహం ఎదురు తిరిగింది. సింహం ముఖం దగ్గరకు వెళ్లి మరీ అత్యంత శక్తివంతంగా గర్జించింది. ఈ ఊహించని పరిణామానికి సాక్షాత్తు ఆ సింహరాజే కాసేపు వెనక్కి తగ్గి, శాంతించడం విశేషం.
మొదటి చూపులో ఇది రెండు క్రూర మృగాల మధ్య యుద్ధంలా అనిపించినా దీని వెనుక ఒక అద్భుతమైన ప్రకృతి రహస్యం దాగి ఉంది. వన్యప్రాణి నిపుణుల విశ్లేషణ ప్రకారం.. సంభోగం చేసే ముందు మగ సింహం యొక్క బలాన్ని, శక్తిని పరీక్షించడానికి ఆడ సింహాలు అనుసరించే మార్గం ఇది. తనతో జతకట్టబోయే మగ సింహం రేపు తనను, తన పుట్టబోయే పిల్లలను ఇతర శత్రువుల నుండి రక్షించగలదా లేదా? అని సింహరాశి ఇలా పరీక్ష పెడుతుందట. ఒకవేళ మగ సింహం ఈ గర్జనకు తట్టుకుని నిలబడితేనే, అది సమర్థవంతమైన భాగస్వామిగా ఆడ సింహం అంగీకరిస్తుంది.
ప్రకృతి అద్భుతం
ఈ శక్తివంతమైన గర్జనల పర్వం ముగిసిన తర్వాత రెండు సింహాలు ప్రశాంతంగా కలిసి కదలడం వీడియోలో చూడవచ్చు. ప్రకృతి మనుగడ వ్యూహాలు అత్యంత మనోహరంగా, ఆశ్చర్యకరంగా ఉంటాయని ఈ వీడియోను షేర్ చేసిన ఉర్మిల్ ఝవేరి అన్నారు. ఆసియా సింహాలకు నెలవైన గిర్ అడవుల్లో ఇలాంటి దృశ్యాలు కనిపించడం చాలా అరుదు.
