Namibia : ఆఫ్రికా దేశమైన పేరు వినగానే మనకు నల్లజాతీయులే గుర్తొస్తారు. ముఖ్యంగా నమీబియా లాంటి దేశంలో 90 శాతానికి పైగా జనాభా నల్ల జాతీయులే(బ్లాక్ పీపుల్). కానీ, ప్రస్తుతం జరుగుతున్న టీ20 వరల్డ్ కప్ 2026లో ఆ దేశ జట్టును గమనిస్తే మాత్రం కథ వేరేలా ఉంది. ఫిబ్రవరి 12న ఢిల్లీలో టీమిండియాను ఎదుర్కోబోతున్న నమీబియా జట్టులో కేవలం ఇద్దరంటే ఇద్దరే నల్లజాతీయులు ఉండటం ఇప్పుడు అందరినీ ఆశ్చర్యానికి గురి చేస్తోంది. ఆ ఇద్దరు ఆటగాళ్లు మరెవరో కాదు.. బెన్ షికోంగో, మాక్స్ హెన్నింగో. వీరిద్దరూ ఫాస్ట్ బౌలర్లు. మరి మెజారిటీ జనాభా ఉన్న చోట జట్టులో మాత్రం ఇంత తక్కువ మంది ఎందుకు ఉన్నారో వివరంగా తెలుసుకుందాం.
నమీబియా జట్టులో ఈ వ్యత్యాసానికి కారణాలేంటి?
నమీబియా జట్టులో ఇంత తక్కువ మంది నల్లజాతీయులు ఉండటానికి ప్రధానంగా చారిత్రక, సాంస్కృతిక కారణాలు ఉన్నాయి.
చారిత్రక నేపథ్యం: నమీబియా 1990 వరకు సౌతాఫ్రికా ఆధీనంలో ఉండేది. ఆ కాలంలో క్రికెట్ అనేది కేవలం శ్వేతజాతీయుల క్రీడగా మాత్రమే పరిగణించబడేది. తెల్లజాతీయులు చదువుకునే పెద్ద పెద్ద స్కూళ్లలోనే క్రికెట్ కోచింగ్ ఇచ్చేవారు. నల్లజాతీయులు ఉండే ప్రాంతాల్లో కనీస మౌలిక సదుపాయాలు ఉండేవి కావు.
రాజధాని ప్రాముఖ్యత: నమీబియా రాజధాని విండ్హోక్ లోనే క్రికెట్ ఎక్కువగా ప్రాచుర్యంలో ఉంది. ఇక్కడ శ్వేతజాతీయులు ఎక్కువగా నివసిస్తారు. గ్రామీణ ప్రాంతాల్లో ఉండే నల్లజాతీయులకు క్రికెట్ కంటే సాకర్ (ఫుట్బాల్) అంటేనే ఎక్కువ ఇష్టం.
కోటా విధానం: సౌతాఫ్రికా తరహాలోనే నమీబియాలో కూడా 2010 నుంచి కోటా సిస్టమ్ అమలు చేస్తున్నారు. అయితే క్రికెట్ అక్కడ ఇంకా ఎదుగుతున్న క్రీడ కావడం వల్ల, అట్టడుగు స్థాయి నుంచి నల్లజాతీయుల భాగస్వామ్యం పెరగడానికి సమయం పడుతోంది.
సౌతాఫ్రికా మూలాలు: ప్రస్తుత నమీబియా జట్టులోని చాలా మంది ఆటగాళ్లు సౌతాఫ్రికా మూలాలు ఉన్న శ్వేతజాతీయులే. అందుకే జట్టులో వారి ప్రాతినిధ్యం ఎక్కువగా కనిపిస్తోంది.
నమీబియా జట్టు ఫిబ్రవరి 12న భారత్ లాంటి పెద్ద జట్టుతో తలపడుతోంది. ఈ మ్యాచ్ ద్వారా వచ్చే ఆదాయం, గుర్తింపుతో నమీబియాలో క్రికెట్ పట్ల నల్లజాతీయులలో కూడా ఆసక్తి పెరుగుతుందని ఆ దేశ క్రికెట్ బోర్డు ఆశిస్తోంది.
మరిన్ని క్రికెట్ వార్తల కోసం ఇక్కడ క్లిక్ చేయండి..
