ఉరుకులు పరుగుల జీవితంలో ఎన్నో అనారోగ్య సమస్యలు వెంటాడుతున్నాయి.. ఇలాంటి పరిస్థితుల్లో ఆరోగ్యాన్ని కాపాడుకునేందుకు.. ఆరోగ్యకరమైన జీవనశైలి, ఆహారం తీసుకోవడం మంచిది.. అలాంటి ఆరోగ్యకరమైన విషయాల్లో ఈ అద్భుత పానీయం ఒకటి.. అదేంటో కాదు.. జస్ట్ 2 రూపాయలకు దొరికే నిమ్మకాయ.. అలాగే వేడి నీరు.. ప్రతిరోజూ ఉదయాన్నే వేడినీరు, నిమ్మరసం కలిపి తాగడం వల్ల ఎన్నో ఆరోగ్య ప్రయోజనాలు లభిస్తాయని ఆరోగ్య నిపుణులు చెబుతున్నారు. మనం సాధారణంగా నిమ్మరసాన్ని చల్లని నీటిలోనో లేదా శీతల పానీయాలలోనో తాగుతాం. అయితే, ఆయుర్వేదం, ఆధునిక వైద్య నిపుణులు గోరువెచ్చని నీటిలో నిమ్మరసం కలిపి తాగమని సిఫార్సు చేస్తున్నారు. ప్రతి ఉదయం ఖాళీ కడుపుతో ఒక గ్లాసు గోరువెచ్చని నీటిలో ఒక నిమ్మకాయను పూర్తిగా పిండుకొని తాగడం వల్ల అది మన శరీరానికి సంజీవనిలా పనిచేస్తుంది. డాక్టర్లు కూడా సిఫార్సు చేసే ఈ పానీయం వల్ల కలిగే తొమ్మిది అద్భుత ప్రయోజనాలు కలుగుతాయి. అవేంటో తెలుసుకుందాం..
ప్రతిరోజూ ఉదయాన్నే వేడి నిమ్మరసం తాగడం వల్ల కలిగే 9 ప్రయోజనాలు..
కొవ్వును కరిగిస్తుంది: మీరు బరువు తగ్గాలని చూస్తున్నట్లయితే, వేడి నిమ్మరసం ఉత్తమ పానీయం. నిమ్మరసంలోని ఔషధ గుణాలు శరీరంలో పేరుకుపోయిన అదనపు కొవ్వును కరిగించి, రక్త సరఫరాను మెరుగుపరుస్తాయి. దీనివల్ల గుండె ఆరోగ్యంగా ఉంటుంది.
షుగర్ వ్యాధికి చెక్: మధుమేహం ఉన్నవారికి నిమ్మరసం ఎంతో మేలు చేస్తుంది. ఇది రక్తంలోని గ్లూకోస్ స్థాయిలను అదుపులో ఉంచి, షుగర్ లెవెల్స్ పెరగకుండా కాపాడుతుంది.
వ్యర్థాల శుద్ధి: మనం పీల్చే గాలి, తినే ఆహారం ద్వారా శరీరంలోకి వెళ్ళే విష పదార్థాలను బయటకు పంపడంలో వేడి నిమ్మరసం అద్భుతంగా పనిచేస్తుంది. ఇది మీ శరీరాన్ని లోపల నుండి శుభ్రం చేస్తుంది.
రోగనిరోధక శక్తి పెంపు: నిమ్మరసంలో ఉండే విటమిన్ సి, యాంటీఆక్సిడెంట్లు సహజసిద్ధమైన యాంటీబయాటిక్గా పనిచేస్తాయి. ఇది రోగనిరోధక శక్తిని పెంచి, వైరల్ ఇన్ఫెక్షన్లు రాకుండా అడ్డుకుంటుంది.
కిడ్నీలో రాళ్ల నుంచి ఉపశమనం: నిమ్మరసం తాగడం వల్ల శరీరంలో పొటాషియం, సిట్రేట్ స్థాయిలు పెరుగుతాయి. ఇది కిడ్నీలో పేరుకుపోయిన రాళ్లను నెమ్మదిగా కరిగించడానికి సహాయపడుతుంది.
గాల్ బ్లాడర్ రాళ్లకు పరిష్కారం: కేవలం కిడ్నీలే కాదు, గాల్ బ్లాడర్ అంటే పిత్తాశయంలో రాళ్ల వల్ల వచ్చే కడుపునొప్పిని తగ్గించడంలో కూడా ఈ పానీయం తోడ్పడుతుంది.
జీర్ణ సమస్యలకు పరిష్కారం: గ్యాస్, అసిడిటీ, మలబద్ధకం వంటి సమస్యలతో బాధపడేవారికి వేడి నిమ్మరసం ఒక వరం. ఇది జీర్ణ వ్యవస్థను చురుగ్గా ఉంచి, తిన్న ఆహారం త్వరగా అరిగేలా చేస్తుంది.
మెరిసే చర్మం కోసం: చర్మంపై ముడతలు, మచ్చలు తగ్గి, చర్మం కోమలంగా, కాంతివంతంగా మారాలంటే నిమ్మరసం తాగాల్సిందే. ఇందులోని యాంటీఆక్సిడెంట్లు చర్మానికి మంచి మెరుపునిస్తాయి.
నొప్పులు – వాపుల నుంచి ఉపశమనం: కీళ్లనొప్పులు, వాపులతో బాధపడేవారికి ఇది మంచి ఉపశమనాన్ని ఇస్తుంది. అలాగే ఫ్లూ జ్వరం, దగ్గు, జలుబు వంటి సమస్యల నుండి కూడా త్వరగా కోలుకునేలా చేస్తుంది.
ఇలా.. ఒక గ్లాసు వేడి నిమ్మరసం మీ శరీరంలో ఎన్ని అద్భుతాలు చేస్తుంది.. ఖరీదైన మందుల కంటే మన ఇంట్లో దొరికే ఈ సహజమైన పానీయం ఎంతో మేలు చేస్తుంది. ఇంకెందుకు ఆలస్యం ఉదయాన్ని ఒక గ్లాసు వేడి నిమ్మరసంతో మీ రోజును ప్రారంభించండి. నిమ్మరసం తాగిన తర్వాత పళ్ళ ఎనామిల్ దెబ్బతినకుండా ఉండడానికి సాధారణ నీటితో నోటిని పుక్కలించడం మంచిది.
మరిన్ని హెల్త్ వార్తల కోసం ఇక్కడ క్లిక్ చేయండి..
