క్యాన్సర్ (Cancer).. గత కొంత కాలంగా మానవజాతిని బాధిస్తున్న అత్యంత ప్రాణాంతక వ్యాధుల్లో ఒకటిగా మారింది. ఈ వ్యాధి రకాలను ముందుగానే గుర్తించకపోతే.. చికిత్స చాలా కష్టం అవుతుంది. అయితే, వైద్య శాస్త్రం గడిచిన కొన్ని దశాబ్దాల్లో విప్లవాత్మక పురోగతులు సాధించింది. కీమోథెరపీ, రేడియేషన్, ఇమ్యునోథెరపీ వంటి పద్ధతులు క్యాన్సర్ రోగుల చికిత్సలో సహాయపడుతున్నప్పటికీ.. ఇవి కొన్ని సైడ్ఎఫెక్ట్లతో కూడి ఉంటాయి. ఇలాంటి సందర్భంలో, శాస్త్రవేత్తలు కొత్త ఆశాజనక ఆవిష్కరణను చేశారు. తాజా పరిశోధనల ప్రకారం.. బటన్ పుట్టగొడుగులు (Button Mushrooms) క్యాన్సర్ రుగ్మతను తగ్గించడంలో సహాయపడే కొన్ని సమ్మేళనాలను కలిగి ఉన్నట్లు తెలుస్తోంది. ఈ పుట్టగొడుగులు శరీరంలో క్యాన్సర్ కణాల పెరుగుదలను నిరోధించడంలో, రోగనిరోధక శక్తిని పెంచడంలో, గుండె సంబంధిత సమస్యలను తగ్గించడంలో సహాయపడతాయని చెబుతున్నారు.
క్యాన్సర్ నివారణలో కీలక ఇవే..
పుట్టగొడుగుల్లో కనిపించే బయోయాక్టివ్ సమ్మేళనాలు, పాలీసాకరైడ్లు, టెర్పెనాయిడ్లు, β-గ్లూకాన్లు, స్టెరాయిడ్లు, పాలీఫెనాల్స్, ఫ్లేవనాయిడ్లు, ప్రోటీన్లు, పెప్టైడ్లు.. క్యాన్సర్ నివారణలో కీలక పాత్ర పోషిస్తాయి. నేషనల్ లైబ్రరీ ఆఫ్ మెడిసిన్ నివేదిక ప్రకారం.. ఇవి ముఖ్యంగా గ్యాస్ట్రిక్ క్యాన్సర్ (కడుపు క్యాన్సర్) నివారణలో ప్రభావవంతంగా ఉంటాయి. దీంతో క్యాన్సర్ నివారణకు ఈ పుట్టగొడుగులు ఉపయోగపడుతాయని చెబుతున్నారు.
రోజుకు ఎంత తినాలి?
1966–2020 మధ్య జరిపిన 202 క్యాన్సర్ అధ్యయనాల విశ్లేషణలో.. రోజుకు కేవలం 18 గ్రాముల బటన్ పుట్టగొడుగులు తినడం వల్ల క్యాన్సర్ ప్రమాదాన్ని సుమారు 45% తగ్గించగలమని తేలింది. దీనికి ప్రధాన కారణం.. పుట్టగొడుగులో ఉన్న శక్తివంతమైన యాంటీఆక్సిడెంట్ అయిన ఎర్గోథియోనైన్.
పుట్టగొడుగులు క్యాన్సర్ నివారణకే కాదు.. విటమిన్స్, ఖనిజాలు, రోగనిరోధక శక్తిని పెంపొందించే ఫలితాలతో ఆరోగ్యానికి మేలు చేస్తాయి. ఉదాహరణకు, ఓస్టెర్ పుట్టగొడుగులు విటమిన్ B12, D పుష్కలంగా కలిగి ఉంటాయి.
పరిశోధకుల సూచనలు
కీమోథెరపీ లేదా రేడియేషన్ వంటి చికిత్సలు తీసుకుంటున్న రోగులు, రోగనిరోధక వ్యవస్థలో కొంత పాడుచేయబడవచ్చు. అలాంటి సందర్భాల్లో, ఆహారంలో పుట్టగొడుగులను చేర్చడం వల్ల సహజ రక్షణను బలోపేతం చేయడంలో సహాయపడుతుంది. కానీ, క్యాన్సర్ రోగులు పుట్టగొడుగులను మాత్రమే చికిత్సగా వాడకూడదు.
ఇప్పటికీ, క్యాన్సర్ రోగులపై వాటి ప్రభావాలను అర్థం చేసుకోవడానికి మరిన్ని పరిశోధనలు జరుగుతున్నాయి. క్యాన్సర్ రీసెర్చ్ యూకే ప్రకారం.. ఇప్పటివరకు పుట్టగొడుగులు క్యాన్సర్ను పూర్తిగా నివారించగలవని లేదా నయం చేయగలవని ఖచ్చితమైన ఆధారాలు లేవు.
బటన్ పుట్టగొడుగులు మన ఆహారంలో చేర్చడం ఒక ఆరోగ్యకరమైన అలవాటు. ఇవి రోగనిరోధక శక్తిని పెంచి, శరీరాన్ని వ్యాధులతో పోరాడటానికి శక్తివంతం చేస్తాయి. క్యాన్సర్ రోగులు దీన్ని వారి వైద్యులు సూచించిన పద్ధతులతో కలిపి తీసుకోవడం వలన, ఆరోగ్య ప్రయోజనాలను పొందవచ్చని పరిశోధకులు సూచిస్తున్నారు.
