H-1B వీసా కార్యక్రమాన్ని తొలగించడానికి ఒక అమెరికా చట్టసభ సభ్యుడు ఒక బిల్లును ప్రవేశపెట్టారు. కంపెనీలు పదేపదే వ్యవస్థను దుర్వినియోగం చేసి, చౌకగా విదేశీ కార్మికులను USలోకి దిగుమతి చేసుకున్నాయని ఆయన ఆరోపించారు. ఫ్లోరిడాకు చెందిన రిపబ్లికన్ US ప్రతినిధి గ్రెగ్ స్టీబ్ EXILE చట్టాన్ని ప్రవేశపెట్టారు. H-1B వీసాలను తొలగించడానికి ఇమ్మిగ్రేషన్, పౌరసత్వ చట్టాన్ని సవరించాలని ప్రతిపాదించారు. “అమెరికన్ పౌరుల శ్రేయస్సు కంటే విదేశీ కార్మికులకు ప్రాధాన్యత ఇవ్వడం మన విలువలను, జాతీయ ప్రయోజనాలను దెబ్బతీస్తుంది” అని స్టీబ్ ఒక ప్రకటనలో తెలిపారు.
అమెరికన్లకే ప్రాధాన్యత..!
“మా కార్మికులు, యువత H-1B వీసా వల్ల ఎక్కువగా నిరాశ్రయులవుతున్నారు. బలహీనపడుతున్నారు, ఇది మా శ్రామిక శక్తిని పణంగా పెట్టి కార్పొరేషన్లు, విదేశీ పోటీదారులకు ప్రయోజనం చేకూరుస్తుంది. మేము మా పిల్లల కలలను పౌరులు కాని వారికి అప్పగించడం కొనసాగిస్తే మేము వారి కలలను నిలబెట్టుకోలేము. అందుకే కష్టపడి పనిచేసే అమెరికన్లకు తిరిగి ప్రాధాన్యత ఇవ్వడానికి ‘ఎగ్జైల్ చట్టం’ను ప్రవేశపెడుతున్నాను” అని US కాంగ్రెస్ సభ్యుడు గ్రెగ్ స్టీబ్ అన్నారు. భారతీయ నిపుణులలో ఎక్కువ మంది USలో నివసించడానికి, పని చేయడానికి H-1B వీసాను ఉపయోగిస్తున్న సంగతి తెలిసిందే. అందువల్ల, H-1B వీసాను తొలగించడం భారతీయ నిపుణులకు పెద్ద దెబ్బ అవుతుందంటున్నారు ఎక్స్ఫర్ట్స్.
H-1B వీసాలపై కఠినమైన ఆంక్షలు
ఇదిలావుంటే, డోనాల్డ్ ట్రంప్ ప్రభుత్వం చట్టవిరుద్ధ వలసలపై కఠిన చర్యలను ముమ్మరం చేసింది. H-1B వంటి వీసాలపై కొత్త కఠినమైన ఆంక్షలను విధించింది. H-1B వీసా కార్యక్రమాన్ని దుర్వినియోగం చేయడం జాతీయ భద్రతకు ముప్పుగా పేర్కొంటూ, కొత్త H-1B వీసాలపై 100,000 డాలర్ల రుసుము విధిస్తూ ట్రంప్ గత సంవత్సరం ఒక ప్రకటనపై సంతకం చేశారు. ఈ చర్య భారతీయ నిపుణులలో విస్తృత భయాందోళన, గందరగోళం, ఆందోళనకు కారణమైంది. H-1B వీసా గ్రహీతలలో 80 శాతం కంటే ఎక్కువ మంది భారతీయులు, చైనీస్ పౌరులే ఉన్నారు. అయితే ఇది అమెరికాకు చెుందిన యువ కార్మికులకు ప్రాధాన్యత ఇవ్వడానికే అని ట్రంప్ తన ప్రకటన పేర్కొన్నారు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..
